Sognefjellsvegen er ein eldgamal ferdselsveg. Fisk og salt frå vest og smør, skinn, jern og tjære fra aust vart frakta på eigen rygg eller med kløvhest. Vardane gav ferdafolket tryggleik for å finne vegen i all slags vær. Frå Sognefjellsvegen har du lett tilkomst til Jotunheimen nasjonalpark med Galdhøpiggen, Noregs høgaste fjell, og fleire av dei andre største toppane i Noreg,- og til Jostedalsbreen, Noregs største isbre. Her kan du rusle på eiga hand blant høge tindar, bli med kjentfolk på ein guida tur over brear og toppar og gå på ski heile året. Turen mellom innland, høgfjell og fjord byr på store natur- og klimakontrastar og mangfaldig flora og fauna. Frå lågare strok med kulturlandskap, furuskog og vilkår for busetnad, til arktisk natur ca. 1000 m.o.h. Her er det snaufjell med tydelege spor frå istida, med gras, mose, lav og stadvis små einer og vier, og her finst nøysame, arktiske plantar som issoleie, og her og der fjellbjørk. På Sognefjellet lever både villrein og tamrein, og nedover mot bygdene elg, hjort og rådyr. I høgfjellet trivs ørn og fjellvåk. I austlege strok kan det vera streifdyr av bjørn, ulv, gaupe og jerv, men desse er få og sky. For meir informasjon sjå sidene om Sognefjellsvegen på turistveg.no.

I Lom stavkyrkje vart tømmer datert til 1158. Kyrkja er framleis i bruk som hovudkyrkje i Lom. Inne i kyrkja finn ein mellom anna ei stor samling måleri frå 1700-talet og mykje vakker akantusskurd. Opp gjennom tida har kyrkja vore bygd om og utvida fleire gonger, noko ein kan sjå tydelege spor av. Då kyrkja vart restaurert fyrst på 70-talet vart det høve til omfattande utgravingar. Det vart gjort fleire interessante funn av pilegrimsmerke, runestavar, pergamentdokument og det største samla myntfunnet i Noreg på heile 2245 myntar.

Opplev fire årstidar i fjellheimen på storskjerm, form di eiga s-elv i sand og vatn, hels på mammutar, sniff inn lukta av sure sokkar og sjå funna frå fjellvikingane. Opplev dei verdskjende fonnefunna: Noreg sin eldste sko, eldste boge, eldste klesplagg og eldste ski med binding – skattar som har smelta fram frå isen i fjella. Prøv rebusløypa og leik dykk i vêrrommet! Her er noko for alle som likar fjell og natur.

Jotunheimen Hestesenter held til på Raubergstulen og her kan du oppleve den vakre naturen under Galdhøpiggen frå hesteryggen. Vi tilbyr fjellridning/tur-ridning for alle, med og utan rideerfaring. Islandshestane våre er gode tur-kameratar, dei er vant til tur-ridning og tek deg sikkert fram i terrenget. Barneriding og lengre turar kan avtalast. Ta kontakt for program og bestilling. For å komme til Raubergstulen:køyr rv 55 frå Lom sentrum til Galdesand, 20 km, deretter Galdhøpiggvegen til venstre og 5 km fram til Raubergstulen.