Velkomne til eit av Noregs største og eldste folkemuseum! Sogn Folkemuseum er eit friluftsmuseum med bortimot 40 historiske bygg frå mellomalderen fram til i dag. Museet ligg i eit flott natur- og kulturlandskap, med gangevegar, stiar, leikeplassar og naturløyper. I sommarsesongen driv museet ein gard med dyr av gamle rasar, slik dei gjorde det for omlag 150 år sidan. På friluftsmuseet er det lagt til rette for at born skal trivast. Her finn de ei mengde aktivitetar, leikeområde, naturløyper og eventyrskog, der born og familiar kan boltra seg og oppleve natur, kultur og historie. I museet sin hovudbygning finn ein utstillingar knytt til levd liv i Sogn. Ein kan sjå gamle handverkarverkstader, gå på besøk til det gamle tannlegekontoret eller kika inn i den gamle krambua. Me har og utstillingar om og for born og unge. Her er det og leike- og aktivitetsområde der borna kan gå på oppdaging. I hovudbygget finn de og museumsbutikken og den økologiske museumskaféen vår, Kafé Heiberg.